मधेशमा ४ सिटका लागि ११ उम्मेदवारको प्रतिस्पर्धा

मधेश प्रदेशबाट हुने राष्ट्रियसभा निर्वाचनका लागि विभिन्न राजनीतिक दलबाट ११ जनाले उम्मेदवारी दर्ता गराएका छन्। चार सिटका लागि कांग्रेस–एमाले गठबन्धन, माओवादी केन्द्र, लोकतान्त्रिक समाजवादी पार्टी नेपाल र जनता समाजवादी पार्टी नेपालका उम्मेदवार चुनावी मैदानमा उत्रिएका हुन्।
लोसपा नेपालका अध्यक्ष महन्थ ठाकुरले ‘अन्य’ समूहबाट उम्मेदवारी दर्ता गराएका छन्। उनको प्रस्तावकमा लोसपाकै मधेस प्रदेशसभा सदस्य जयनुल राइन र समर्थकमा रानी शर्मा तिवारी छन्। ठाकुरको उम्मेदवारीलाई जसपा नेपालले समेत समर्थन जनाएको छ।
जसपा नेपालबाट राष्ट्रियसभा सदस्यका लागि तीन जनाले मनोनयन दर्ता गराएका छन्। अल्पसंख्यक समूहबाट सप्तरीका शैलेश चौधरी, महिलातर्फ सिरहाकी चन्दा साह र दलिततर्फ धनुषाकी चमेली देवी दास उम्मेदवार बनेकी छन्।
नेकपाबाट दलित कोटामा शम्भु पासवान, अल्पसंख्यकतर्फ रामनन्दन प्रसाद, अन्य समूहबाट लक्ष्मण पौडेल र मधेसी कोटाबाट समी कुमारी अग्रवालले उम्मेदवारी दर्ता गराएका छन्।
यसैगरी कांग्रेस–एमाले गठबन्धनतर्फ दलित कोटामा नेपाली कांग्रेसका अमरेन्द्र पासवान, अल्पसंख्यक कोटामा कांग्रेसकै रञ्जित कर्ण र महिला कोटामा एमालेकी रेखा झाले उम्मेदवारी दर्ता गराएकी छन्।
मधेस प्रदेशमा चार राष्ट्रियसभा सिटका लागि विभिन्न दल र गठबन्धनबीच प्रतिस्पर्धा चर्किने देखिएको छ। उम्मेदवारी दर्तासँगै अब चुनावी रणनीति र अंकगणित निर्णायक हुने राजनीतिक विश्लेषकहरू बताउँछन्।